港交所主席夏佳理（Ron）嘅愛駒「超班」受腳傷困擾，休養咗成年，喺上個月初再戰馬場，但卻三甲不入，所以阿Ron最終忍痛決定畀佢完全退下，專心養傷。其實「超班」嘅往績都唔差，○七年出道時，一季就贏過三次頭馬，係當年嘅最佳新馬，退役前總獎金約有一百六十萬元，依家「超班」因傷退役，確實令人大失所望。
「超班」依家只得五歲，咁早就退役，真係令阿Ron蝕大本。阿Ron自嘲，「超班」已經唔算最敗家，因為佢有隻購自愛爾蘭嘅賽馬「火燭車」買咗幾年完全冇出過賽就退役，一蚊獎金都冇贏過。
其實阿Ron養過唔少戰績彪炳嘅賽馬，好似「翠河」就曾經有三冠馬王嘅美譽。何解阿Ron近年咁失策呢？阿Ron苦笑道：「唔係我冇眼光，係幫我揀（馬）嘅人冇眼光咋。」