「光纖之父」高錕下個月會到瑞典領取諾貝爾獎，一定會再帶嚟一陣高錕熱，究竟點樣可以同高校長更接近，或者可以同佢影張合照呢？行政會議召集人梁振英（ＣＹ）嘅囝囝傳昕咁啱喺瑞典，佢下令囝囝要搵一份類似帶位嘅差事，搵個機會近距離接觸高錕。
ＣＹ有三個仔女，傳昕最大，今年二十歲，喺大學讀幹細胞。佢最近跟隨導師去咗瑞典，咁啱高錕遲啲去瑞典首都斯德哥爾摩攞諾貝爾獎，ＣＹ吩咐個仔要搵個小角色做吓，例如做帶位，希望有機會接近高校長，或者可以同佢影番張合照添。不過能否影到合照反而唔重要，更重要嘅係囝囝有機會置身諾貝爾頒獎現場大開眼界，話唔定激發咗佢第日都要攞番個諾貝爾獎呢。
ＣＹ兩個囡囡都喺英國讀緊中學，ＣＹ經常飛去英國開會，順便可以喺彼邦同仔女見見面。由於經常搭飛機，ＣＹ練就一上飛機就瞓着覺嘅本領，絕大多數時候，未等到飛機起飛嗰一刻，佢就瞓着咗，搭長途機連飯都唔使食。