或者因為民政事務局嘅工作範疇包括埋粵劇，副局長許曉暉（Florence）幾個月前開始學唱粵曲，連八和會館主席汪明荃都大讚，話Florence身為高官肯學粵曲好難得，仲話遲啲等西九文化區正式開幕，可以叫Florence去做表演嘉賓，身體力行推動藝術發展添！
尋日係粵劇日，康文署喺文化中心有個粵曲演唱會，請嚟唔同嘅粵劇名伶獻唱，除咗吸引大批粵劇迷去聽曲，就連Florence同汪明荃都有去捧場。Florence本身都對中國戲曲有好濃厚嘅興趣，但就一直都無機會學，原來佢已經坐言起行，幾個月前開始學唱粵曲。
Florence話自己學唱子喉，雖然唔係學咗好耐，但都覺得幾好玩。佢咁忙，會唔會好似「書法派」班女高官咁成日走堂呢？Florence就話佢請老師上佢屋企單對單咁教，相信就無呢個問題嘞！不過Florence可能拜師日子尚淺，講起成績係點就怕怕醜醜，連自己師承何人都唔肯透露，不過就話遲啲一定搵機會向汪阿姐學吓嘢喎！