資訊科技界立法會議員譚偉豪讀番書出身，靠做IT生意起家，閒來又鍾意踢波同搞足球隊，生活睇嚟相當西化，但原來佢非常熱愛中國傳統文化，除咗會用《道德經》嚟教仔之外，佢每個禮拜都會做一次中醫針灸同耍太極，話可以令到自己腦筋靈活同心情平和啲，對立法會工作好有幫助。
做IT嘅最緊要係腦筋靈活轉數快，IT豪嘅秘訣就係每個禮拜六，都會去位於西環嘅一位針灸師度拮番幾針。佢話後生時同好多香港人一樣，淨係相信西方醫學治療，但隨住年紀愈嚟愈大，就發現啲西藥嘅副作用真係好厲害，慢慢改為睇中醫同煲中藥食。
近年佢有感於啲中藥嘅來源同品質良莠不齊，攙咗啲農藥或西藥都冇人知，就進一步深究其他更自然嘅療法，後來經朋友介紹認識到呢位針灸師，試過之後覺得對方非常有料，每次針完之後，都覺得成個人醒咗好多，就每個星期六都嚟畀佢「糟質」一次，次次都拮到滿頭鋼針，成個科學怪人咁先至夠過癮。早兩個禮拜佢有兩聲咳，醫師就幫佢喺心口同喉嚨拮多兩針。
IT豪每周六做完針灸之後，隔兩日又會轉去灣仔區，搵另一位隱世太極高手楊師傅學習耍太極。佢話跟咗楊師傅超過五年，最初學太極拳同推手，近期就「升呢」轉學太極劍。佢自言以前性格相當性急，學太極令自己心情平和咗好多，喺立法會遇到有人掟嘢爆粗，都唔會畀人激親。