本文重點
政改諮詢文件出爐半個月，泛民策動五區總辭，香江政局再掀波瀾，就喺呢個敏感時刻，出身英國情報機關軍情六處、近年每逢香港政壇有大事發生例必現身香江嘅前布政司霍德，尋日又喺香港出現，真係夾都無咁準。過往○三年「七一」五十萬人上街、○五年泛民否決政改方案，同埋○七年陳老太「唔嫁又嫁」參加港島補選，期間霍德都有來港。尋日佢回應查詢時話，此行無接觸香港政界人士，真係信不信由你？
尋日下晝四點半，霍德同太太喺慣常入住嘅金鐘香格里拉酒店Check in，唔見一段日子，佢對鷹目依然炯炯有神。自從本月十八日政改諮詢文件出台之後，香港政壇再起風浪，佢遲唔會遲，早唔會早，咁啱又出現。
話無約見搞事三人組
一直保持住電訊盈科非執行董事身份嘅霍德，以電話回覆查詢時解釋，來港係要出席電盈董事局會議，將會逗留至星期四，期間無計劃同港府或者政界人士聯絡。被問到會唔會約見前下屬陳老太、李漢奸同淫賤黎，霍德話，以往曾經喺英國倫敦與陳老太同李漢奸碰過一次面，純屬一般社交活動，之後都無見過咁話。
唔少政界人士都知，霍德係陳老太嘅「恩師」，有份一手培植陳老太接替自己出任首位華人布政司，回歸之後亦一直同陳老太保持緊密聯繫，被視為陳老太與英國政府嘅傳話人兼幕後軍師。○七年港島補選前夕，霍德現身香港之後，陳老太「唔嫁又嫁」決定參選，泛民內甘乃威等亦聽話惟有讓路。
近幾年嚟，凡有政壇大事，霍德都冇一次失場。不過世事無常，搞事三人組陳老太、李漢奸同淫賤黎喺今次總辭嘅立場上已經陣腳大亂，李漢奸仲承認唔識政治添，咁嘅一場鬧劇，幕後軍師要幫手收拾殘局，都唔係咁易㗎。