本文重點
松露飄香季節開始咗近一個月，香氣濃郁嘅白松露已瀰漫各大高檔餐廳，白松露身價媲美黃金，為咗一親呢粒「白鑽石」香澤，名人都話要豪一豪。東華三院主席李三元豎起手指讚帝苑酒店Sabatini Ristorante Italiano嘅白松露香到極，教育局局長孫明揚太太鍾小芬就推介香港會嘅白松露，讚佢貨真價實。
刨幾克落意粉沙律
卓妮日前同李主席飯敍，講起美食，佢話Sabatini嘅白松露「味」力無窮，馥郁芳香飄滿餐廳每一角落，就算企喺門口都香到暈得一陣陣。白松露堪稱絕世好菌，李主席話佢配乜都好食，刨幾克白松露落意粉、沙律或鵝肝中，即時起畫龍點睛效果，佢透露有嘴刁食家愛吃「私家白松露」，提早預訂一舊上等靚貨放喺餐廳內「隨時候命」，不過松露保存不易，出土後嘅賞味期只有短短十日左右，為咗唔想食得有壓力，佢就唔會「囤積」白松露嘞。
食白松露，一啖值千金，現時餐廳每克白松露約售一百五十元至一百六十元，通常每道菜刨兩至三克已足夠，孫明揚太太都話每年都要歎吓白松露，唔食就心思思，佢推介香港會，貪佢價錢公道，喺炒蛋上加幾片，已有美味驚喜。
歎松露食到人耳仔郁，但講到貼心食品，李三元首推東華旗下「樂群麵包工房」嘅愛心曲奇，上周五佢專登走入去位於香港仔嘅麵包工房，捲起衫袖學整朱古力曲奇。成立兩年嘅「樂群」係東華屬下社會企業之一，聘請殘疾人士教佢哋焗麵包、蛋糕。佢話學員焗出嚟嘅曲奇媲美酒店水準，連滙豐、賽馬會及律師公會等大機構都落柯打。
喺下月十二日嘅「歡樂滿東華」，李主席將首次粉墨登場同國際著名男高音莫華倫一齊獻技，李主席都係唱家班，曾經拜師學唱歌，兩人同台演出，未知會否擦出火花？
卓妮