創校一百二十周年嘅名牌中文中學培正中學尋晚在機場博覽館舉行校慶晚宴，筵開二百七十一席，大部分舊生及海外校友濟濟一堂，當中不乏社會名人精英，包括為人熟悉嘅科技大學創校校長吳家瑋、港鐵行政總裁周松崗、立法會議員何鍾泰、香港足球總會主席梁孔德、入境處處長白韞六等，就連「柴九哥」黎耀祥個囝囝都係培正一分子。
好多培正校友不約而同諗起讀書時啲百厭嘢，六十年代畢業嘅周松崗就唸口簧話：「嶺南牛、真光豬、培正馬騮頭……」即係話培正學生好百厭咁解，有幾百厭呢？周松崗憶述，當年主要有兩大百厭嘢，就係用粉筆塗滿書枱四條邊，等老師行過「揩」到一身都係粉筆粉，認真大整蠱；其次係用髮夾插入書枱木板之間罅隙，用力一彈即發出「登登」聲。
一九六五年畢業嘅梁孔德就憶述，當年培正對面係墳場山頭，好多「校外活動」例如踢波同打架都喺呢個山頭進行，又見過學校宿生到附近士多偷嘢食，但梁孔德自稱無試過打架同偷嘢，只係鍾意踢波喎！
同樣係培正校友嘅政務司司長唐英年就話，以前返學要經過一條長長梯級，長年累月鍛煉腳骨力，近期回想當年走過呢條梯級，感受更深，覺得做事要一步一步、腳踏實地去做。唐唐忽然有感而發，唔知係咪想暗示參選特首要逐步嚟呢？