東亞運籌備期間屢現蝦碌，醜聞頻傳，到正式開賽，真係唔知發生乜嘢令香港人丟架嘅事，但係醜婦終須見家翁，東亞運好快殺到，於是德成局長尋日喺《香港家書》撰文，煞有介事探討「如何衡量我們這次東亞運是否成功？」德成局長話，唔能夠單純以獎牌論英雄，而係睇「香港人的參與和表現」喎。嘩！咁咪將個波推咗畀全港七百萬名市民？

唔敢提政府統籌能力

德成局長列舉例子，好似義工刻苦排練、運動員艱辛鍛煉，同埋市民上年睇奧運馬術賽嘅文明表現，證明全民投入同參與係幾咁重要，不過，將會左右東亞運成敗嘅關鍵因素，偏偏德成局長提都唔提，就係政府嘅統籌能力嘞。如果東亞運搞到一鑊粥，就算義工點樣投入、運動員點樣努力、市民點樣有文明素質，都無用啦！德成局長講嘢咁識避重就輕、左閃右避，唔落場參加欖球賽真係嘥晒！

事實係，東亞運一直醜聞不絕，好似主場地將軍澳運動場田徑跑道被發現凹凸不平，部分須重新鋪設；健美項目被迫取消；海外推廣門票成效不彰；花式單車、田徑同柔道等界別本地運動員投訴喺選拔時遭到不公平對待等等，個頭開到咁爛，收尾唔慌好得去邊。政府可能已經打定輸數，唔怪得德成局長早早撰文，為東亞運做定期望管理，為東亞運失敗鋪定下台階啦。