郝龍斌有幾好嘢呢？即係咁，當你將正氣凜然嘅台北同姑息養奸嘅香港比一比，你就會發覺呢個夠晒果斷嘅市長真係好好嘢，掃蕩烏煙瘴氣嘅強硬作風絕對前途無限。

大家都知，淫賤黎出晒名誨淫誨盜，旗下壹淫媒作惡多端，喺香港橫行無忌，違法案底厚過電話簿照樣逍遙法外，因為港式官僚餐餐都係包庇縱容。之但係，台北就唔同嘞，由於壹淫媒喺台灣推出「動新聞」，利用電腦動畫模擬新聞案情，其實係掛羊頭賣狗肉，一味販賣色情暴力，例如繪聲繪影重演獸父姦女。色情暴力固然好大問題，喂，乜嘢叫做模擬？模擬即係虛構啦，即係老作啦，畢竟事發經過冇人百分百了解詳情。假如你係性侵或暴力案件受害人，見到自己成為「動新聞」主角，首先你已經覺得傷口畀人灑咗一大堆鹽，其次咯喎，原來案情又係憑空想像嘅，完全不符事實，你會點諗吖？你會唔會覺得畀人捅完一刀又一刀吖？

由於「動新聞」實在太令人厭惡嘞，喺台灣惹起軒然大波，幾十個民間團體群情激憤，聯手操去壹淫媒總部抗議。其中一個婦女團體代表質問淫賤黎：如果你的妻子、小孩遭到性侵、暴力、自殺事件，你願意讓妻小看「動新聞」嗎？

問得好！可惜吖，淫賤黎冇答到。梗係唔敢答啦，萬一傻更更答一句「我願意」，後果真係難以想像，怒氣沖沖嘅台灣民眾可能乜都做得出，禍及妻兒就唔好啦。

既然民意沛然莫之能禦，郝龍斌就出手做嘢嘞。郝市長前日雷厲風行宣布，向台灣壹淫媒懲處最高罰則，罰款五十萬元新台幣。「郝青天」仲話，「動新聞」嚴重影響青少年身心發展，違反兒童及少年福利法，必須嚴厲懲罰，如有再犯，必將再罰。

呢嗱嗱嗱，言猶在耳，果然講得出做得到。郝龍斌認為「動新聞」雖然刪除咗部分淫賤內容，不過仍然有部分不堪入目，違反法例，所以再罰五十萬。換言之，一連兩日總共罰咗一百萬元新台幣。

講到呢度，係時候睇下香港政府幾咁姑息養奸。莫講話香港從來未試過連續兩日對淫賤黎重錘出擊，即使壹淫媒違反《淫褻及不雅物品管制條例》過百次，次次都輕判了事，罰款永遠係一萬幾千雞碎咁多。

唉，台灣正氣打淫媒，香港姑息助邪風，你話係咪眼冤！

礙於眾怒難犯，而且官民同心，壹淫媒迫不得已發聲明道歉。不過咯喎，淫賤黎道歉不嬲都係當食生菜㗎啦，呢頭鞠躬道歉，嗰頭作惡多端。計功夫茶話齋，台灣同胞不必理會道歉聲明，一於繼續圍剿壹淫媒。至於剛正不阿嘅郝龍斌，對壹淫媒當然最好見一鑊罰一鑊。咦咦咦，咪住先，罰多幾鑊係咪可以當佢係屢犯不改嘅頑劣分子，繼而勒令停業㗎？係就好咯，一天光晒！