民主黨元老司徒華日前踢爆以壹傳媒集團主席黎智英為首嘅「搞事四人幫」，搞咗黑箱飯局強推五區總辭。呢個飯局最吊詭同耐人尋味之處，在於揀咗喺淫賤黎屋企舉行。須知出席呢個飯局嘅四名政界人士，李柱銘係泛民主派最大政黨民主黨嘅創黨主席、華叔係民主黨嘅前黨鞭兼現任支聯會主席、陳方安生係前港英殖民政府嘅第二把交椅、李鵬飛則係前兩局首席議員，能夠號召到四人同時雲集自己屋企搞局，唔通淫賤黎做咗泛民主派幕後黑手？定係佢自以為係泛民超級召集人？當中仲有乜嘢不可告人嘅秘密呢？
李柱銘尋日接受傳媒訪問時，就刻意將成單醜聞攬晒上身，聲稱個飯局其實係由佢約人嘅，又話飯局揀喺淫賤黎屋企舉行，純粹係因為個大廚煮嘢勁好食，啲房又大又舒服方便傾嘢喎，真係講都冇人信，擺明係幫飯局嘅真正搞手淫賤黎開脫！難道西環或者親中人士搵個米芝蓮三星大廚烹調黑松露加一頭鮑，佢哋就會移師去敵陣開會傾密偈咩？
李柱銘自己都講咗，由呢個秘密飯局引發嘅泛民內鬥，已經演變成佢從政以來嘅最大危機，控制得唔好會毀咗香港成個民主大業。若然李柱銘求仁得仁，淫賤黎呢個幕後黑手，分分鐘搖身一變成為華叔口中「遺臭萬年嘅千古罪人」！