本文重點
雖然話相愛容易相處難，不過套用喺夏利里拉（Harilela）家族就絕對唔啱用，事關佢哋家族嘅愛侶對對都好長情，近日「五班」Gary Harilela同太太Kamal舉行金婚紀念慶祝晚宴，同親人朋友一齊大事慶祝，喺酒店擺足十一日流水宴。可以同愛人共度半個世紀，白頭到老仍然恩愛如昔，真係令卓妮好羨慕！望着愛妻，Gary好情深咁話，覺得自己好幸運，因為有一個明白自己、支持自己嘅好太太。
夏利里拉家族係香港出名嘅印度豪門，其家族經營嘅五星級酒店遍布歐亞，財產以百億計，所以「五班」嘅金婚又豈能豆泥？今次嘅金婚宴連擺十一日，宴請近二千個賓客，場地以印度人喜愛嘅金色作主調，並細心迎合各嘉賓口味，場內放有多張不同飲食主題嘅Buffet枱，連北京填鴨都有，點止薄餅咁簡單！
夏雅朗擇偶要有愛心
穿上米白色紗麗嘅Kamal，與Gary站在金碧輝煌嘅大禮堂接受來賓祝賀，場內大屏幕不停播出佢哋結婚照片同生活照，仲有孫仔越洋祝賀短片，場面好溫馨！Gary細仔Raju就滿場飛招呼賓客，Raju話爸媽咩都有，所以同姐姐唔使傷腦筋送咩禮，只要陪住父母一齊過呢個開心時刻就OK。
至於Raju嘅堂兄弟夏雅朗（Aron）喺上海返港，就即刻趕嚟恭喜叔父，眼見父母同叔父們都有幸福婚姻，仲係單身嘅Aron話，父母都想佢成家，好在開通嘅爸爸無催婚，但媽媽就有介紹好女仔佢識。Aron係城中出名嘅鑽石黃老五，不過佢話自己擇偶條件好簡單，最緊要有愛心，佢希望搵到一個「Next Level」嘅對象，不過何謂「Next Level」，Aron話只能意會，不能言傳，總之搵到就知道，可惜依家仲未搵到。其實Aron成日飛咁忙，乾脆搵個空姐做女友咪得囉，鬼馬嘅Aron聽到即時話：「咁又唔好！」睇怕好多靚女空姐好失望囉。
卓妮