地政總署早前指幾間私營骨灰龕違反地契條款，但就拒絕提供詳情，而營辦商仲同政府就「人體遺骸」嘅定義有分歧，仲可能會對簿公堂添！地政總署執法態度曖昧，發展局局長林鄭月娥則避得就避，早前喺一個記者會度，先搵新聞秘書擋駕，跟住想快閃，最後畀記者逼出一句：「一定會支持地政總署進行地契嘅執法工作。」
不過睇怕林鄭閃唔得幾耐，事關喺十二月九號嘅立法會大會上，議員提問鬧雙胞，甘乃威同陳淑莊分別喺立法會提出口頭同書面質詢，都係追問政府會點樣規管私營骨灰龕嘅問題，呢次林鄭不但走唔甩，簡直係插翼難飛。
甘威同陳淑莊係直接競爭對手，喺多個問題上都爭先出招。早前兩人爭住幫中環擦鞋匠，之後灣仔爆水管，又爭住做嘢博出位，呢次甘威又同陳淑莊就骨灰龕問題爭入Ｑ，甘威搶先做口頭質詢，可謂贏咗一仗。