因前高官加入商業機構而觸發嘅利益衝突問題，近年備受關注，先有房屋署前副署長鍾麗幗加入恒基旗下嘅香港小輪，引起外界強烈批評，後又發生梁展文風波，令俗稱「過冷河」嘅禁制期不斷加長，官門之內已怨聲載道。

金漆招牌變負資產

最近市場傳出，梁展文風波引發嘅餘震再度擴散，為免累請咗前高官嘅機構畀立法會「公審」，令私人市場變成驚弓之鳥，有專為大企業物色管理層嘅獵頭公司，將前高官列為「危險物品」處理，掂都唔敢掂，連第一輪考試嘅機會都無！以前做過高官係金漆招牌，依家變成退休後求職嘅負資產，真係世界輪流轉。

唔好怪獵頭公司狠心，眾所周知，做得高官，隨時做過十個、八個部門，同業界關係千絲萬縷，退休後加入跨行業大企，隨時誤踩地雷而不自知，萬一被揭發，聘用嘅大企業變相無端惹禍上身，獵頭公司為求自保，喺呢段風頭火勢時期同前高官劃清界線，明智之舉。

人力資源顧問公司董事總經理周綺萍證實，行內現時對前高官的確好避忌，費事成為下一次「梁展文事件」嘅無辜受害者。合眾人事顧問總經理蘇偉忠指，依家業界小心咗好多，睇前高官嘅「快勞」好似查三世書咁查，佢話，未聽聞「封殺」前高官之說，不過，呢啲係不成文政策，有行家做咗都唔會認啦。