本文重點
千億新抱徐子淇嫁入豪門後，父母亦「升呢」，入住由親家四叔李兆基送贈逾億寶雲道豪宅富匯豪庭。原來子淇父母對投資物業都有興趣，卓妮日前喺大佛口撞正徐父徐傳順同太太喺度睇舖，表現雀躍。
睇舖前，徐父徐母先去金鐘太古廣場日本餐廳ROKA歎下午茶，同枱仲有兩位男性友人，一行四人飲到黃昏六點離開，一路行一路傾到雞啄唔斷，原來係相約去睇樓，四人行到去大佛口皇后大道東六十一號一幢五層高唐樓前停低，徐父徐母喺大廈門前巡視一輪後，沿住大廈外圍行埋去後門睇睇。
卓妮所見，徐母同友人不時擔高頭左望右望，似對上址物業甚有興趣，睇咗一輪後，兩位友人先行離開，徐父徐母繼續巡視，睇足半粒鐘至走人，臨行前徐母再喺附近嘅美聯物業地產公司櫥窗前駐足觀看，
吓最新放盤情況，直至徐父催促太太上車，兩人才登上一架七人車返回富匯豪庭屋企。呢次睇樓行動最後是否成事，就要問過徐父徐母至知嘞。
人流漸多具升值潛力
太古廣場第三期落成，大佛口一帶都帶旺咗，唔少人趁機購入上址一帶物業變身特色食肆及私房菜館，令人流漸旺，物業升值潛力與日俱增，未知係咪因為咁，吸引子淇父母入市掃貨呢？
至於徐父徐母到實嘅皇后大道東六十一號物業，樓高五層，地舖約有一千七百幾平方呎，一樓舖位則有三千二百幾呎，據熟悉該處嘅地產界人士透露，地下及一樓舖位已於今年三月由一間名叫「花樣年華」公司租下。
卓妮