呢嗱，挪威已經證實首宗新變種豬流感病毒殺人個案，病毒會深入患者呼吸系統令病情加重，當地已經有兩人死於變種豬流感；英國有醫院同一病房五名病人因為抗藥病毒人傳人中招；美國亦首次出現集體豬流感抗藥性病例，四個患者死咗三個；一河之隔嘅深圳第一次有人因感染豬流感死亡。

無論遠或近，周圍已經響晒警鐘。睇番香港，衞生當局反而一副「成竹在胸」咁款，滋油淡定未驚過。醫管局行政總裁蘇利民尋日話，公立醫院已經做好準備迎接第二波疫情來臨，必要時會加開八十張深切治療部病床應付。佢仲話本港能妥善處理第一波疫情，相信有能力應付未來疫情喎。

唔係啩？醫管局咁就叫做足抗疫準備工夫，兒唔兒戲咗啲吖？第二波豬流感來勢洶洶，加得八十張病床咁大把，如果本港大吉利是出現疫情大爆發，一日百幾二百人出現嚴重感染症狀，唔通叫病人去瞓醫院走廊同大堂？

功夫茶唔係齋噏㗎，衞生防護中心話，嚟緊嘅流感高峰期會有二百一十宗嚴重個案。港大微生物學系系主任袁國勇估計，高峰期會持續四到六個禮拜，甚至唔排除會有幾個高峰期，如果呢二百幾宗嚴重個案喺呢段時間出現，就會逼爆公立醫院深切治療部。

豬流感大爆發迫在眉睫，至弊滋油淡定嘅唔止醫管局官員，食衞局副局長梁卓偉同樣對疫情輕描淡寫。佢話流感病毒出現輕微基因轉變唔出奇，挪威嘅個案並未顯示豬流感病毒「變惡咗」，相信英國懷疑有抗藥性豬流感人傳人都係個別病例啫。

照咁講，即係冇有怕啦。不過功夫茶要提醒衞生高官一句，唔好忘記六年前沙士襲港嘅慘痛教訓。豬流感已經證明足以致命，人命關天，防疫工作寧緊勿鬆，咁簡單嘅道理，就算唔係專家都明白啦。

依家啲病毒對治療豬流感最普遍嘅特敏福已經產生唔同程度抗藥性，治療藥物危機已經出現。另外，深圳亦出現咗豬流感死亡個案，當地疾控中心話，豬流感比季節性流感傳播速度更快，估計會有過百萬人受感染。

嚟緊嘅聖誕同明年二月農曆新年兩個長假期，會有大量旅客經深圳出入境，疫情高峰隨時南移香港，而且唔排除會出現變種豬流感病毒。請問各位醫療衞生高官，你哋真係做好準備咩？

當年港府應對沙士先係漫不經心，跟住又方寸大亂，最終付出近三百條無辜生命嘅慘痛代價。對豬流感威脅輕描淡寫，極可能誤導市民，放鬆防範。若果到真係出現大爆發嗰陣，當局至臨急抱佛腳補鑊，咁就一切都已經太遲咯。