結婚近廿年嘅沈祖堯接受電台訪問時講，當年佢同沈太都係香港大學醫學院學生，佢比沈太高兩屆，作為師兄嘅沈祖堯，不時就以借筆記畀師妹參考為名，擺到明追師妹，後來兩人到同一醫院實習，大部分相處時間都喺醫院入面。沈祖堯仲話，沈太當年決定做婦產科醫生，都係經佢提議㗎喎。

為興趣不顧家族生意

至於佢自己，當年都就事業方向有過一番考量，事關沈爸爸從事驗眼行業，六七年開咗間眼鏡舖，多年嚟希望囝囝做眼科醫生，成日話「你做眼科醫生就好囉，可以介紹啲病人去我度配眼鏡！」可惜沈祖堯對醫眼無乜興趣，最後都無顧及家族生意，無揀眼科。沈爸爸並無因囝囝唔揀眼科而嬲，反而加倍支持，沈做咗幾年醫生後，憑獎學金去加拿大修讀博士，但支出遠遠超過獎學金金額，沈爸爸主動提供財政援助，令佢深受感動。