大家應該仲記得，ＣＹ喺上年四月開始，突然對基層貧窮問題表現得好關注，高調批評工資保障運動，又話要幫清潔工「英姐」轉工，自此之後，佢有意落場參加二○一二年特首選舉嘅動機就愈嚟愈明顯。ＣＹ對貧窮問題樂此不疲，有目共睹，上個星期一連兩檔喺扶輪社同工商專聯講完，前日喺自己個網誌又講多次，文章題目係「基層不能分享經濟發展成果，是社會怨氣的一大源頭」，仲一口氣列舉一大串經濟數據，證明基層生活有幾艱難。

要政府決心解決貧窮問題，ＣＹ以行政會議召集人嘅身份，當面同煲呔曾講一句，有用過寫一百篇網誌，發表一千次演講啦。除非佢同煲呔曾講咗，但係煲呔曾唔聽，又或者佢諗住將佢嘅睇法講幾年，講到特首選舉嗰陣要嚟做競選政綱喇。如果唔係，搞到同煲呔曾同床異夢咁，個政府仲未夠跛腳咩！