跑馬講技術外，亦考運氣。大輝就發現，唔入馬場打氣反而有頭馬贏。佢尋日揼晒心口之餘仲講笑話，本來真係諗住企喺馬場門口等「極奇妙」作戰完畢先入場，點知都係忍唔住，唔知係咪因為咁，「極奇妙」衝刺一刻竟然輸咗個馬鼻，激到大輝紮紮跳。其實計計數，佢都有廿五萬獎金落袋。

肥仔張掛住禾花雀

至於去邊度慶祝生日，大輝就話寧願返屋企同媽媽、太太食飯，工人煮咗佢最愛嘅苦瓜排骨黃豆湯，夠晒溫馨。

旅發局主席田北俊匹新馬「現代武士」就無「極奇妙」咁醒嘞，尋日首次落場跑千六米賽事，田少打定輸數，費事入場，反而身為自由黨副主席嘅黨友張宇人（Tommy）就入場打氣。講起天時冷有乜好食，食家Tommy就話掛住東莞嘅燒禾花雀，佢仲繪影繪聲咁話，放啲膶腸入隻雀入面一齊燒仲好味，聽見都流晒口水。

卓妮