致辭忽然轉話題

尋日工聯會立法會議員黃國健（KK）喺油塘嘅議員辦事處開幕，一向同勞工界關係唔錯嘅張建宗獲邀做主禮嘉賓兼致辭。不過呢啲情況，通常都係吹捧吓議員落力做地區工作，再祝佢會務蒸蒸日上就算，但張建宗嘅發言就有啲古怪。

一開始佢就大讚KK同政府理念一致，又重提上個月施政報告度點回應KK一向重視嘅安老政策同最低工資立法，在場嘅嘉賓都聽到有啲一頭霧水。過多陣佢又話政府、市民同政黨要「同心協力」，又指大家坐埋同一條船，所以要「和衷共濟」先可以化險為夷。噏咗一大輪，到底張建宗想大家「協力」做啲乜呢？答案喺最後兩分鐘終於出嚟！

明明上一分鐘仲係講緊最低工資，張建宗下一分鐘就忽然提起政改方案，仲話希望大家積極發表意見，叫人用開放包容嘅態度討論，令香港嘅民主可以向前邁進一步。言詞之懇切，好似佢先係政改正牌推銷員咁。在場觀眾見張建宗講得咁激動，惟有報以熱烈掌聲當做支持。

事後KK送咗個「勤」字嘅書法作品畀張建宗，睇嚟係想表揚吓佢肯捱義氣幫唐唐同林D9一齊「同舟共濟」！不過工聯會始終都係親建制派，加上佢哋四個立法會議員都已經點頭應承撐政改，就算係畀張建宗今次小試牛刀，順利過關喇。嚟緊唔知會唔會三司十二局都講政改呢？由唔同嘅人講政改，帶嚟嘅新鮮感唔通會為政府帶嚟更多支持票？