本文重點
中環人不少喜歡打高球，深圳觀瀾湖係數一數二嘅熱點。搵觀瀾湖太子爺朱鼎健（Ken）做訪問，要直踩觀瀾湖，皆因除咗飛外國開會，佢絕少留港。觀瀾湖綠草如茵，留住呢位公子朝朝五點幾起身打波。聽落好寫意，原來係為咗打好底應付沉重嘅工作壓力。「我每日都唔夠時間用，會議一個接一個，唔操Fit身體，根本頂唔順。」
Ken朱自創「一心多用法」，每朝打波唔坐球車寧願跑草地，呢個妙法一舉兩得，既可練氣又可巡視業務：「草地上有乜問題，我坐球車未必睇見，跑步的話，一睇就睇到。」員工見太子爺朝朝巡場，冇人敢偷懶。
勤練波亦為省招牌，擁有二百一十六洞嘅觀瀾湖，係全球五萬個球會中唯一匯聚五大洲風格嘅國際球場，唔少國家元首、國會議員及政治人物均慕名而來，Ken朱透露，交過手嘅政商界名人多不勝數，菲律賓前總統拉莫斯兩個幾禮拜前都嚟過，大家仲打咗場友誼波，勝負係點就唔講嘞，總知一定唔會打讓賽，反而盡力打出高水準，Ken朱話：「我唔想丟觀瀾湖架。」
觀瀾湖野嶺變王國
事實上，觀瀾湖都經歷過入不敷支嘅艱難日子，連Ken朱都開口叫過爸爸放棄，唔好再掟錢發展觀瀾湖：「連我都曾經懷疑，真係有咁多人嚟打波嗎？」不過父子同心，佢選擇力撐爸爸，與細佬朱鼎耀（Tenniel）咬緊牙關作戰，三人同心協力，灌溉出今時今日嘅百億高球王國。
卓妮