現時全港公共圖書館均設有列印服務，供讀者列印電腦資料。林先生發現各區圖書館竟收費不一，相差高達五成，個別圖書館更可免費列印，對「一署幾制」大感混亂，「好似印黑白A4紙咁，有啲（圖書館）每張收個半，有啲一蚊，有時又唔使錢，最慘就係（圖書館）周圍都冇貼收費準則，職員話收幾多就幾多，都唔知係唔係！」

大埔公共圖書館列印電腦資料僅收費一元。

中央圖書館列印電腦資料收費每張一元五角。

少改少錯 懶理市民負擔

對被指列印收費混亂，康文署發言人解釋，轄下圖書館至今仍沿用兩個前市政局訂定收費，市區及新界區圖書館列印費因此存在差異。市區圖書館的黑白列印費為A4紙每頁一元五角；新界區圖書館則為每頁一元。為鼓勵電腦學習，市民如自備紙張於轄下廿五個「電腦資訊中心／資訊區」列印個人製作資料，可免費列印一份。

「香港咁細，點解仲分區收費？市區同新界嘅列印成本乜唔係一樣咩？咁多年都唔檢討，係咪又驚多改多錯所以索性唔改就算？」立法會民政事務委員會委員陳克勤斥康文署因循僵化，接管兩個前市政局十年仍未統一收費，加重市民負擔。

何先生：「康文署係咪覺得相差五毫子好小事？有乜理由依家仲用緊以前市政局嘅收費？對我哋啲小市民好唔公平！」

陳女士：「少數怕長計，小朋友做親功課印十張、八張，夾夾埋埋條數就好襟計，康文署唔好又要有公眾壓力先做嘢！」

學者直斥制度不合時宜

城市大學專業進修學院學術統籌宋立功則直斥康文署收費模式不合時宜，以沿用前市政局收費制度作解釋更不合理，「逾期還書罰款都統一咗，有乜理由列印費仲未統一？政府收費應該有劃一標準，冇理由帶頭製造唔公平！」

社區組織協會幹事施麗珊指出，不少清貧學生須使用公共圖書館電腦，對康文署至今仍未統一全港圖書館收費大感驚訝，「唔通住香港同九龍嘅人有錢啲？一蚊一張已經好貴，咁同政府帶頭搶錢有乜分別？」

記者 吳琰玲