尋日喺會展一個酒會上，碰到唔少政商界名人，好似長實副主席李澤鉅、信置主席黃志祥、利豐主席馮國經等，個個盛裝而至，立法會議員陳淑莊（Tanya）一出現，更全場嘩然。晏晝三點幾，一個留波浪形長髮、着綠色無袖旗袍嘅女人翩然而至，十足《花樣年華》入面嘅張曼玉，睇真啲其實係Tanya。Tanya話件旗袍喺上海訂造，有喜慶事先拎出嚟着，雖然買咗七、八年，但依家都係咁啱身，可以想像Tanya嘅身材多年不變！
另一立會新丁李慧琼一襲黑色長裙，再加件毛茸茸嘅華麗披肩，令人眼前一亮。天氣寒冷，商務及經濟發展局常秘蔡瑩璧都加番件紅色披肩，佢話呢條係本地品牌，實行身體力行支持本地經濟。前高官廖秀冬就着大紅色外套撐場，華麗又端莊。一向富貴嘅葉劉淑儀就着咗件Paul Smith紅色套裝，褸袋係個手套造型，高貴得嚟好特別。