運輸及房屋局向立法會提交文件，話明年會推出多項改善小巴安全嘅措施，包括規定小巴要安裝限速器同俗稱黑盒嘅行車記錄儀，限速器鎖定最高時速八十公里，部分路線小巴會放寬至時速一百公里，仲規定小巴司機入職前要完成培訓課程。

嘩！當局呢次大發神威，限速器、黑盒打孖上，司機仲要攞埋「上崗證」至開得工，硬件、軟件齊晒，咁大陣仗，唔打得都睇得。係就係姍姍來遲，拖咗咁多年先至做嘢，但遲到總好過冇到，依家嘅問題係，措施推出之後，亡命小巴會唔會絕迹，乘客坐車係咪安全啲，咁就真係要放長雙眼，睇過至知。

講真，小巴變成殺人市虎，司機駕駛態度唔好、亡命飛車固然係「元兇」，但政府部門作風官僚，得過且過，一拖再拖，簡直就係「幫兇」。

嗱，如果要小巴司機安全駕駛，唔好掟個彎又衝上巴士站，行慢線又會高速撞人哋車尾，最實際梗係裝個一超速就截油、踩爛油門都唔可以狂飆嘅限速器啦。原來運輸署早喺二○○一年已經開始研究小巴安裝限速器，點知拖咗一年又一年，到依家至落實。咁多年來，都唔知有幾多無辜市民做咗亡命小巴輪下冤魂，政府可謂累人累物！

仲有吖，咪話功夫茶唔提醒班懶官，咪以為裝咗黑盒同限速器就萬事大吉，從此闊佬懶理，唔監唔管，咁隨時會好似部分小巴車速顯示器得物無所用嘅咋。港府研究限速器拖得就拖，諗住靠個一超速就嘟嘟聲響嘅車速顯示器就搞掂晒，就可以安枕無憂。點知好多小巴司機根本將嘟嘟聲當歌仔聽，時速過百公里一樣繼續畀油，有顯示器等於冇顯示器。

向政府投訴？慳番啖氣啦。有乘客坐小巴十五分鐘由上水飛到屯門，打電話去投訴，警方居然要事主去警署落口供。坐亡命小巴執番條命已經算好彩啦，又要去警署，日後仲要上法庭添，咁即係叫市民收聲，唔好投訴嘅啫。當局消極執法，擺到明想推卸監管責任啦。

講真，如果政府正視問題，主動做嘢，小巴司機點夠膽想超速就超速吖，好似以前有的士司機改裝咪錶呃乘客，警方「放蛇」拉人，改裝咪錶嘅現象咪絕晒迹囉。對付小巴超速一樣咁簡單，只要搵個便裝警員放蛇坐上小巴，車速顯示器一「嘟」就影相，有齊人證物證，仲點會有人夠膽超速吖。

計功夫茶話齋，儀器係死嘅，人係活嘅，最緊要係執法者嘅態度。事實證明，無論引入乜儀器，採取乜措施，道高一尺，魔高一丈，如果當局唔跟進，唔監管，裝個黑盒敷衍一下就大安旨意，關人個關，到頭來只會有更多慘劇發生。