四代同堂 飲得杯落

黃志祥、兒子黃永光及女兒黃敏華Nikki尋晚不約而同入咗馬場，去到先知道大家都在場，於是信心十足約定去拉頭馬，結果「永利多」不負眾望跑出，三人齊齊落場拉頭馬，黃志祥仲開埋香檳慶祝添！問到即將榮升爺爺嘅心情如何？黃志祥就好開心咁話：「高興，梗係高興啦，四代同堂嘛！」

黃志祥口中嘅「四代同堂」，包括佢年屆八十一歲嘅父親、新加坡遠東集團創辦人黃廷方，然後到黃志祥本人、第三代就係兒子永光，永光將出世嘅兒子自然成為第四代啦！黃廷方為新加坡地產大亨，剛在兩月前榮登美國財經雜誌《福布斯》○九年「亞洲新加坡富豪」榜首，資產淨值達六百二十四億港元。

信置旗下樓盤銷情理想，家族又即將增添一名新成員，黃志祥真係飲得杯落。問黃志祥會否為孫兒改名，他話改名問題應由身為爸爸嘅永光去做喎，究竟改咗個乜嘢名呢，永光就話要賣個關子，到出世時先公布。尋晚永光拉完頭馬後，就急急腳獨自離開馬會，莫非係趕住返屋企照顧太太？