阿Paul呢條質詢已經向立法會秘書處「入紙」輪候，佢一竹篙打晒所有公職人員，政府官員、行政會議成員、立法會議員、區議員、公營機構同半官方機構僱員，都涵蓋在內，問當局有冇機制統一處理用公帑買機票所得嘅飛行哩數，要求當局澄清呢啲飛行哩數係咪屬於公共財產？質詢表面字眼溫和，實際對立法會議員卻頗具殺傷力。

眾所周知，政府官員同公營機構僱員，現時已有規定，公幹賺到嘅飛行哩數須全數上繳，機票獎賞留番下次公幹用，無得落袋，而區議會又甚少長途考察，所以，阿Paul呢條質詢，首當其衝嘅肯定係立法會議員。依家議員使用飛行哩數換機票，並無明文列明得定唔得，唔少議員多年嚟都「物盡其用」，換機票自用，就以啱啱嘅暑假東歐三國團為例，估計積分就足以換取一張香港飛台北機票，都幾吸引㗎。但係，依家阿Paul提出質詢，喚起社會關注，呢項免費機票「福利」隨時被迫取消，搞寸晒party，呢個蜜蜂竇一旦被捅破，隨時有好戲睇。

阿Paul反被指換機票

早前東歐三國考察團，阿Paul提議大家自動放棄坐商務客位，改坐較平嘅經濟客位，聽講已經引起部分同僚不滿，三個月唔夠，阿Paul再喺議員公幹問題提質詢，令佢與同僚嫌隙更深。有議員私下批評阿Paul搞搞震，有人仲作出反擊，指阿Paul參加東歐團時，「佢自己都有換取飛行哩數啦」！

身在海外嘅阿Paul回覆查詢，否認「換機票」指控，話完全無印象，但係一時間唔肯定助理有冇幫佢搞，佢強調，議員有冇以飛行哩數換機票並非佢條質詢嘅重點，佢嘅目的係希望政府檢討統一處理呢筆「公共財產」，令公帑用得其所，而非針對同僚。