本文重點
英國皇室都係愛馬之人。英女王外孫女、安妮公主女兒Zara Philips正展開亞洲之旅，呢幾日訪問本港，行程緊密，Zara尋晚到訪快活谷馬場觀賞賽事後，今早會再參觀及訪問香港傷健策騎協會薄扶林公眾騎術學校。為何兩項活動都同馬匹有關？事關Zara係馬術三項賽世界冠軍囉！
馬術三項賽世界冠軍
尋晚大約七時十五分，Zara與兩名女伴抵達馬場，有數名保鏢喺遠距離保護，Zara步入馬場，行到沙圈外圍逗留咗一陣，直至九時十五分第五場開跑時才離開。據悉，馬會事前未接獲知會Zara會光臨，故此未有安排傳媒採訪，亦唔見佢有特別多嘅隨從前呼後擁。
貴為馬術三項賽世界冠軍嘅Zara，○六年獲英國廣播公司（ＢＢＣ）選為體育界風雲人物，並憑着其卓越嘅馬術成就，於○七年獲頒發大英帝國勳章，所以佢今早訪問薄扶林公眾騎術學校，會分享其作為世界級馬術運動員嘅經驗，屆時馬會主席陳祖澤及英國駐香港總領事奚安竹會陪同出席。