環保嘅影響力真係好大，乜都要講環保，就連ＢＢ仔都無得幸免。勞工及福利局政治助理莫宜端（Zandra）尋日出席長者活動時講起環保問題，就講到佢有幾咁環保。Zandra話，佢屋企好節約用水，十五個月大嘅囝囝沖完涼嘅番梘水會用嚟洗衫，又畀囝囝穿着可清洗嘅環保尿褲，取代舊式即棄尿片。Zandra又話，現時已開始要囝囝戒尿片，訓練佢要出聲去廁所，但係囝囝都仲未學識，囝囝年紀仲細，真係急都急唔嚟。
對於有調查話市民對副局長同政助嘅認知度勁低，Zandra指政助嘅職能係負責政治聯繫，唔應該咁短視想曝光率高啲，否則就唔係好務實。出席同一場合嘅環境局政助蔡少綿亦話唔會刻意谷人氣，先做好現時嘅工作。
其實做政治就係做同人有關嘅工作，莫宜端講吓囝囝戒片都唔錯，至少有啲人情味，好過唔少副局長，例如較為冷漠、出席公開場合只係識背書嘅環境局副局長潘潔咁。