麟哥兩公婆尋日喺中環置地廣場手拖手行街街，行行吓就入咗去喺美國已經有八十幾年歷史嘅名牌糖果店See's Candies，麟嫂喺店內左揀右揀，終於揀定一盒拖肥棒棒糖。麟哥陪老婆行咁耐街無詐型之餘，仲自動自覺拎銀包出嚟畀錢，果然係廿四孝老公！

問番麟哥先知，佢原來專登喺中大宿舍揸車陪老婆出嚟買糖。See's Candies呢種棒棒糖都幾出名，一節手指大細嘅棒棒糖都要成八蚊支，一盒有四種味，包括朱古力、奶油、雲呢拿同咖啡。麟哥話自己細個時都好鍾意食糖，但依家就係太太鍾意食多啲。不過佢哋咁遠嚟買糖，原來都唔係買畀自己食，而係派畀麟嫂嘅中大同事。所以話一個男人係咪錫自己，睇佢係咪愛屋及烏就知啦！

另外，講開人類豬流感嘅疫苗就嚟推出，麟哥就話自己身體強健，點都唔會打喎！不過同係護士出身嘅麟嫂就仲未決定，麟哥話就算自己唔打，但老婆想打嘅話佢會幫佢打。