呢個星期刮起陣陣秋風，令人想起港人至愛嘅大閘蟹。素來鍾意炒蝦拆蟹嘅金融服務界議員詹培忠，前晚約埋四位同佢一樣，一九九一年加入前立法局嘅老友記，一齊去佳寧娜擦大閘蟹。但同樣係九一年入局嘅劉慧卿（Emily）竟然無份，原來同卿姐唔鍾意人哋「炒蝦拆蟹」有關。
民主黨議員張文光、李華明、李永達同埋涂謹申，前晚應邀同金勞詹撐枱腳。聽聞呢餐蟹宴約咗好一段時間，不過一拖再拖，搞到前晚先食得成，席間成班九一議員把酒言歡、風花雪月，連二○一二年特首跑馬仔都提及。
數起黨內九一年入局嘅議員，除咗上述四人之外，Emily都係其中之一。有飯局中人話，一來Emily同金勞詹素來無乜兩句，二來Emily唔鍾意人哋講粗口，一陣間大家飲多咗兩杯，粗口橫飛激親佢就無謂啦！咁又係，成班男人聚埋一齊飲酒食蟹，食到high high哋難免有啲放浪形骸，不過喺度提醒幾位資深議員，大閘蟹好高膽固醇，一隻起兩隻止好啦！