五散人喺上周五嘅施政報告致謝動議投票上，聯手投票支持由泛民主派提出嘅遺憾煲呔曾修訂，雖然修訂最後通過唔到，但已經有正式向煲呔曾政府宣戰嘅意味。喺前晚立法會大會上，五散人其中三名成員再下一城，再度聯手支持同樣由泛民提出嘅要求重建居屋動議，成功令動議爆冷通過。事件除咗令死撐唔肯重建居屋嘅政府，面臨更龐大政治同民意壓力，亦證明咗五散人呢五票喺分組點票制度下，真係起到左右大局嘅關鍵少數作用，絕對不容煲呔曾忽視。

煲呔曾尋日中午喺禮賓府宴請全體立法會議員，本身已經有向班議員求和示好嘅意思，但更具意義嘅係，煲呔曾喺午宴結束後，再邀五散人上禮賓府飲下午茶，仲特別預備咗啲自製蛋糕同餅乾畀五人食，係爭在冇斟茶認錯。

據聞席間煲呔曾向五人表明今後可以經常性見面加強溝通，即使偶爾佢抽唔到時間，都可以搵特首辦主任譚志源代通消息。煲呔曾又早過其他政黨一日，搶先同五人討論政改問題，叫大家理性處事，希望香港政制可以循序漸進，穩步向前，避免再次原地踏步。不過五人就當面向煲呔曾表明，溝通完都唔等於佢哋會變做保皇黨，乜嘢都畀票支持政府，煲呔曾惟有死死地氣咁話：「我都知嘅！」

五散人見煲呔曾之前，仲應要求喺禮賓府門口擺晒甫士合影，大有「成功聯手攻陷禮賓府」之意。保險界陳健波更加正式宣布，五散人已經「升呢」做「五兄弟」。

高達笑煲呔曾幫甘威擋煞

講番餐大圍飯局，唔知煲呔曾係有心定無意，安排咗兩名即將結婚嘅議員夾住自己坐，立即畀人揶揄佢係想為自己沖喜。民主黨李永達更加喺席間陰陰嘴笑咁同煲呔曾講：「真係要衷心多謝你，如果唔係你幫甘乃威擋一擋，做番幾日報章頭版，民主黨實有排煩！」煲呔曾聽完之後乜都講唔出，淨係識一邊苦笑、一邊作狀打咗高達兩鎚，估計佢食完呢兩餐之後，都係背脊骨落！