呢嗱，話口未完，鏹水彈狂魔又發動「恐襲」啦，今次特登揀番深水埗郁手，將載有腐蝕液體嘅啤酒樽掟落街，唔係講笑，夾夾埋埋，已經係該區四個多月內第三宗空襲案。

鏹魔橫行，令深水埗繼旺角之後，成為鏹水彈橫飛嘅重災區，附近出入嘅居民，隨時中頭彩，真係唔驚就假囉。有區議員表示會研究效法旺角行人專用區裝設「天眼」，希望可以有些少阻嚇作用，止到吓咳啦。

問題係，天眼成效有幾好，唔使多講啦，有旺角行人專用區個辦你睇，附近高樓大廈冇錯係裝滿晒天眼，可惜盲點位多籮籮，根本發揮唔到監視作用。就算樓下長期有幾部警車停泊，並出動七、八十人嘅兵力全天候監察又有乜作用吖，結果你有你裝天眼，鏹魔繼續挑戰警方，鏹水彈咪又係掟完又掟。

唔係喎，香港明明係一個法治嘅地方，因乜事鏹魔可以肆無忌憚一而再、再而三出動，直頭當警方冇到呢？其實，大家唔好睇啲警察平時威風八面咁，郁啲就剝光豬搜身，實情係紙老虎，一講到打擊罪案就即刻手軟腳軟。

呢，每當鏹魔出嚟掟鏹水彈，警方來來去去都係嗰幾道板斧。今次都唔例外，又係賊過興兵，懶緊張咁派出大批警員到場展開大規模調查，再勞師動眾派出大批探員洗樓，又搵埋鑑證科人員蒐集證據，係威係勢咁。

可惜吖，唔好以為做場大龍鳳就可以將真兇繩之以法，得個睇字嘅咋。警方劑劑都係有頭威無尾陣，鏹水彈狂徒先後三度襲擊旺角行人專用區，當局甚至懸紅九十萬元緝兇，查來查去都係得個吉，兇徒至今依然逍遙法外。

考吓大家，知唔知高空擲物嘅破案率有幾高？百分之二十幾咋。唔怪得警方自己承認，有啲案係一世都破唔到。唉，佢哋捉唔到鏹水彈狂徒，又有咩出奇吖。

鬼咩，單靠成隊警察做樣守株待兔，點可能拉到人呀，梗係要主動出擊，改變策略，唔理放蛇定埋伏，咁先至有機會破到案吖嘛。

最怕再係咁落去，可能有人心存僥倖，諗住一次捉唔到，兩次捉唔到，三次捉唔到，狂魔愈玩愈大，到時全港各區輪住掟，搞到遍地開花，咁就大鑊喇。仲有吖，一個唔好彩傷到外國旅客嘅話，就弊弊都冇咁弊，香港可以改名叫「亞洲恐怖之都」咯！