「沙士英雄」、現任中大逸夫書院院長沈祖堯獲推薦做中文大學新校長，原來佢之所以肯答應成為校長候選人，全因為三個月前睇咗《出埃及記》，啟發咗佢嘅人生，令佢明白不同時間應該有不同目標，所以願意接受新挑戰，做校長為學生提供一個更好嘅教育平台，並將個人經驗傳授畀學生。莫非沈祖堯要學摩西咁帶領中大生渡紅海？
前高官馬時亨太太王培琪擔任主席嘅全城更新，尋日就喺馬灣挪亞方舟主題公園舉辦「喜悅之城」傳道會，請咗虔誠基督徒沈祖堯做嘉賓，佢就喺活動上透露獲神引領佢做中大校長候選人嘅故事。問沈祖堯對中大校長有乜抱負？佢強調，最重要係同各方面「有偈傾」，好似早前拆卸烽火台風波咁，如果溝通得有技巧，問題自然迎刃而解。
沈祖堯尋日同肥亨分別就家庭、事業及教育等多方面分享經驗，希望散播更多正能量，令青少年戒掉不良習慣，進而更熱愛生命。當兩個男人談到夫妻相處之道時，不約而同話最重要係多溝通，仲夾晒嘴形話女人一定要氹喎，搞到在場嘅馬太和沈太都笑逐顏開。