太太細仔同行
Stephen識飲識食已經係出晒名，早排佢幫電視台拍飲食節目，去法國試酒，順便同太太一齊去玩，點知細仔Ian攞假帶埋女朋友Cindy同行，有孝順囝囝及未來新抱陪住吃喝玩樂，真係夫復何求！Stephen話因為去嘅時候正值夏天最尾嗰兩個星期，冷暖適中，日照時間又啱啱好，成個行程天氣相當好。佢哋今次參觀咗波爾多、勃根地、香檳同阿爾薩斯四個產酒區，地方靚到不得了，仲有機會落田摘新鮮葡萄試食；行咁多地方，過程雖然辛苦，卻令Stephen回味無窮。
景色咁靚，又有靚酒飲，何解連Stephen都覺得有啲辛苦？原來係車程耐：「阿爾薩斯就喺德國旁邊，路程都幾遠，要一早起身坐成七、八個鐘頭車過去，都有少少辛苦，不過就好享受。」
齊落田摘葡萄
Stephen話，辛苦得來係值得嘅：「九月尾係葡萄收割期，我哋去四個唔同產酒區，有機會試晒唔同釀酒葡萄，自己落田摘十幾種葡萄，試食之餘，仲可以即刻睇住佢去皮釀酒嘅第一步程序，又可以同莊主、釀酒師傾偈，呢啲機會相當難得。」其實，淨係睇一家人落田摘葡萄個樣，就知道佢哋幾咁enjoy啦！
Stephen話，今年好特別，甜酒中最名貴嘅Chateau d'Yquem，係用一種畀貴族霉菌侵襲過嘅葡萄釀製，呢種霉菌令葡萄變到葡萄乾咁，相當甜美，加上種植嘅時候，除咗要近河仲要早上有霧配合先得，所以莊主話好有信心今年釀嘅酒，足以媲美1947年嘅佳釀。
甜酒咁sweet，用來擺結婚喜酒咪最啱？識做嘅Stephen即刻封嘴話︰「呢啲我就唔知啦！」不過聽見佢笑到卡卡聲，Ian睇怕同哥哥應該都心中有數喇！
Chateau d'Yquem簡介
在甜酒界享負盛名嘅Chateau d'Yquem，被推崇為液體黃金，只有受過名為「貴腐菌」或「貴族霉」入侵過的葡萄才能成為釀製的材料，每年10至11月，酒莊會以約150人，分6至10次逐粒採收完全感染了霉菌的葡萄，凡是未達標準的都會被棄用。當局規定十分嚴謹，1992年就曾經因為沒有合格的葡萄而乾脆不釀酒。這種霉菌會把葡萄內的水分吸乾，濃縮了的糖分令它變得相當甜美。
採了合適的葡萄榨汁後，會先放於全新木桶中發酵，繼而轉到全新的橡木桶中醞釀36個月。有如黃金般的Chateau d'Yquem新酒，香味濃厚，口感香甜，隨着時間發酵，酒色會漸漸變紅，口感更豐腴細緻，難怪被喻為是世上最佳的甜酒。
卓妮