「雷曼石」石禮謙公開踩同專業會議嘅梁美芬用廟街貨，辣㷫芬姐，芬姐反指對方唔識貨。雷曼石自知玩大咗，尋日主動喺立法會辯論施政報告致謝動議上，公開向芬姐「耍冧」，使出送手袋招數賠罪，點知芬姐唔稀罕。雷曼石惟有使出銀彈政策，「科水」五萬銀氹番芬姐。
雷曼石呢排頭頭撞着黑，幫煲呔曾弟婦爭取賠償風波未了，日前發表「唔同級數樓盤唔同價錢論」，擺咗芬姐上枱，踩佢用嘅手袋係廟街貨，講到過晒火位。尋日大舊石急急喺立法會上向余若薇及芬姐「耍冧」，話自己大意，唔知芬姐當日袋上嘅「Ｔ」字，係名牌「Tiffany & Fred」喎。
雷曼石本來想送番個靚袋了事，芬姐唔收貨，叫佢捐錢好過。雷曼石夠爽快，一口認捐五萬元支持芬姐揸旗嘅西九新動力扶貧基金。講錯一句嘢就唔見五萬銀，真係衰多口累事！大舊石咁識做，芬姐唔使退出專業會議喇。
條氣順晒嘅芬姐，尋日以一身Celine套裝現身立法會，手挽七千元名牌袋Etienne Aigner，腕上戴住隻數萬元鑽石手錶，全身行頭加埋貴過一個普通打工仔成個月人工，話畀人知佢並非「廟街王后」。