如果冇海洋，香港最初就唔可以靠海吃海由漁村起家。如果冇土地，香港就唔可以憑高地價政策托起個市。不過咁，時移世易嘞，今時唔同往日，海洋嘅重要性已經唔係用嚟捉魚曬魚賣鹹魚，而係變成豪宅嘅賣點，冇番一個半個無敵海景，地產發展商點敢獅子開大口咬你幾億呀！換言之，土地講到尾先至係香港最珍貴嘅天然資源。

好嘞，既然土地咁珍貴，處理土地問題係咪應該非常謹慎呀？咁又唔係喎，地政總署顧名思義係管理土地㗎啦，點不知呢個政府部門居然糊糊塗塗張冠李戴，幾乎害到一個地主眼白白冇咗一幅地。喂，中國共產黨家陣都唔再玩鬥地主啦，奉行資本主義嘅香港因乜事幹無端端將人哋塊地一筆勾銷先？

呢個咁離奇嘅古仔係申訴專員揭發出嚟嘅。話說咯喎，有一個地主喺一九六三年購入一幅農地，從來冇轉讓過，去到二○○○年，怪事發生嘞，地主竟然收唔到差餉繳費通知書。作為一個奉公守法嘅良好市民，當然唔會諗到你冇通知我就唔交差餉啦，所以地主就去地政總署查問嘞。不問猶自可，一問呆鬼咗，地主發覺自己塊地竟然唔知點解歸撥四個陌生人名下！

明明冇轉讓，點解咁奇怪？地主追查之下得出答案，原來早於一九七五年，當時嘅理民府職員擺烏龍，馮京作馬涼錯誤將地皮納入一份轉讓契約，亂點鴛鴦嘅結果係地主冇咗塊地，變相共產化。

講到呢度，閒話一句，功夫茶奉勸各位業主，唔好以為有錢以天價買豪宅就可以安枕無憂享清福，得閒記得去查一查冊，睇吓自己名下物業有冇失驚無神畀政府充公。你知啦，大一大塊農地都有本事搞錯，豪宅極其量咪幾千呎，擺起烏龍上嚟好易睇漏眼㗎咋。

言歸正傳，繼續講古。地主既然發覺出錯，梗係要求地政總署更正啦，你估官老爺點講呢？佢哋話喎，政府並非契約當事人，唔能夠糾正錯誤，所以建議地主自行採取法律行動，自己顧自己更正註冊紀錄咁話。

呢嗱嗱嗱，呢啲就係典型嘅官僚主義嘞，即使害到人雞毛鴨血，永遠唔認有錯，總之不負責任。地主於是喺二○○七年向申訴專員公署投訴，公署調查後得出結論，成件事錯不在投訴人，地政總署要求投訴人花錢採取法律行動並不合理。申訴專員進一步要求，地政總署應該盡快處理其他同類個案。

唉，好彩仲有一個主持公道嘅申訴專員咋，如果唔係，一個二個官僚亂咁擺烏龍，鬥完地主又唔肯去收拾爛攤子，喺地政總署帶頭之下共產化，香港樓市唔使出動八萬五都可以徹底摧毀咯！