每個成功女人嘅身邊，好似都有一個靚袋傍身做吓綠葉點綴；但係咪個個都要用最貴嘅綠葉嚟做陪襯呢？前日畀立法會議員石禮謙話拎住個廿萬高貴手袋、身兼大律師嘅立法會議員余若薇（Audrey）就話唔一定，仲話買乜都好，舒服順眼最緊要！
Audrey尋日話，唔好睇佢平時着得好省鏡，其實佢都唔係好捨得使好多錢買手袋，所以誓神劈願話一定無買過廿萬嘅袋咁奢侈，即使十萬蚊嘅袋都無買過喎！不過前日畀人話值廿萬嘅袋到底係咩牌子、值幾錢，佢點都唔肯透露。至於量方面，佢話自己人生經驗有番咁上下，比後生女多幾個袋都好正常喎！
雖然Audrey點都唔肯講最奢侈試過幾錢買個袋，但佢教大家點樣揀一個適合嘅手袋傍身，佢話揀袋唔應該在乎係咪名牌同價錢，而係要睇個袋襯唔襯自己。Audrey試過喺街見到有人拎住個名牌特別版手袋，但拍埋個人就唔多襯，所以即使個袋幾名貴都係唔好睇；當然如果順眼，唔使太貴都可以好舒服喎！除咗感覺，佢話仲要睇場合，如果只係Casual嘅場合，拎住個超級特別版都唔夾啦。不過無論幾襯都好，仲要買得起至得，唔係個個好似Audrey咁有米囉！