本文重點
煲呔曾顧此失彼，「慳電膽益親家」風波未完，有人又將煲呔曾弟婦買雷曼迷債一早得到賠償嘅事向傳媒披露，咁多火頭，完全係全城線眼不值煲呔曾所為，爭相爆料。點知《壹週刊》無風起浪，不點名話煲呔曾弟婦早獲賠償單嘢，係自由黨前主席田北俊向傳媒報料。田少尋日發信畀自由黨常委，鄭重聲明絕無其事。
老屈踢爆雷曼石
最新一期《壹週刊》報道，話「一名自由黨大佬」聽到立法會議員石禮謙協助煲呔曾弟婦索償一事，又刊登咗田少張相，強烈暗示係佢爆料，仲言之鑿鑿，話田少咁做，一為報舊仇，二為扶老友。
田少尋日拿拿臨發信畀自由黨領導、中委及常委澄清，話自由黨同石禮謙的確間中有飯局聚會，最近也曾一齊遊黃山，但佢從未聽過石禮謙協助煲呔曾弟婦去追討雷曼投資產品嘅損失，又點名指報道完全不符事實，係杜撰及臆測。
特區政府施政咁多錯失，全城都睇到實，睇唔過眼就自然會出聲，所以報料人唔一定係有名有姓嘅。