一年一度嘅港區人大、政協委員活動日即將喺深圳舉行，又係一眾人大政協切磋高爾夫球技嘅好機會，○七及○八年高球冠軍分別由福建幫頭領盧文端及政協李大壯奪得，究竟今年會花落誰家呢？今屆波腳離不開好波之人，包括盧文端、陳永棋、黃楚標、黃宜弘、林健鋒、梁君彥等；如果李大壯都出席，必定掀起一番龍爭虎鬥。
盧文端早前表明希望喺今屆同樂日再度捧盃，看來信心十足，睇個勢已經贏咗一半。盧文端至今已打咗二十年高球，佢話當年為咗同日本人做生意，於是學打高球應酬吓，點知上咗癮，佢自讚球技都算唔錯，打十八個標準洞，大約打九十桿，業餘係咁上下嘞！
通常好波背後都要付出代價，盧文端五年前就因為揮桿勁得滯，不慎扭傷條腰，要入養和醫院足足住咗一星期，但無減佢打高球嘅熱情。不過，「強中自有強中手」，盧文端上周日出席馬會觀瀾湖盃時遇觀瀾湖老闆朱樹豪二公子朱鼎耀，仲豎起拇指大讚朱鼎耀打高球了得，七十幾桿打十八個洞，拍得住職業水準。