經濟動力過往試過買不同嘅地道美食去立法會，每次都大受歡迎，但同時亦用咗大量發泡膠飯盒、膠杯、膠碗、膠羹同木筷子，都幾唔環保吓。尋日佢哋特別自備多個可以循環再用嘅大膠箱，盛載大批越南食品，好以春卷、咖喱、香茅豬扒，其中大哥大林健鋒仲即場用最環保嘅方法，即係用手攞嘢嚟食，衞唔衞生就大家自行判斷喇！

經濟動力大姐大梁劉柔芬就話，呢間位於油麻地彌敦道嘅「李錦基越南餐廳」，其實係老公梁孔德發掘出嚟，佢哋食咗十幾年都唔厭，回歸前後店主移民咗去美國洛杉磯開業，一樣賣到成行成市，佢哋去開當地都有專程走去捧場，近年店主回流香港，但冇通知佢哋，佢哋明查暗訪先搵到個地址再次幫襯，認真長情。