三十多名建制派議員早前第二度雲集上海總會共商政事，喺建制派最大政黨民建聯牽頭下，決定首次聯手發炮，發表聯署聲明譴責社民連三子同其他泛民議員喺立法會大會嘅攪局行為。佢哋仲相約喺下月二十七日舉行第三次飯局，明顯係針對即將發表嘅政改諮詢報告，就點樣力撐政府抗衡泛民出謀獻策，尋求共識。

預言補選輸兩席

對於泛民研究透過五區總辭變相舉行公投、挾持民意同政府抗衡，金勞詹尋日就提出一個大膽建議，話如果真係有五名泛民辭職，佢一定會搶住做第六個，然後再空降港島區參選，畀選民多一個選擇。佢連競選口號都諗埋，就係「頂籠呃你一票！」夠晒出位。

金勞詹又預言，泛民喺五區補選中，隨時會輸掉兩席，因為做過九龍東票后嘅工聯會陳婉嫻，已經熱晒身準備出戰；次次補選都會傳出佢個名嘅建制派大佬、工聯會會長兼行政會議成員鄭耀棠，亦唔排除今次會真正出選。若然結果真係咁，泛民諗住借五區補選大勝逼中央讓步嘅如意算盤，就一定打唔響。

金勞詹選金融服務界就未輸過，但地區直選就全無經驗，點解佢講得咁有信心呢？原因唔係港島區特別多潮州人同股票經紀，而係佢睇死泛民一盤散沙、內訌不絕，根本唔會搞得成五區總辭，廿三人總辭更加係癡人說夢，即使自己只係揸住二仔底，都唔怕同對方晒冷！

金勞詹早前冇去北京睇閱兵，去咗拉斯維加斯搏殺，最後贏咗千幾萬港紙番嚟，泛民想同佢賭鋪勁，想唔輸甩褲都幾難！

不過金勞詹亦強調，佢哋今次撐嘅係中央同整體特區政府，唔係煲呔曾個人，又炮轟煲呔曾當年未上任就誇下海口話要落實「強政勵治」，好似未開波就話自己贏硬五比○，點知一落場就踢到亂晒坑，好快就失晒信心，真係令人Ｏ晒嘴。