30/10/2009

中環出更:伍沾德為反歧視創辦美心

嶺南大學尋日舉行學位頒授典禮,其中獲頒榮譽工商管理博士得主大有來頭,就係每日好多市民幫襯嘅美心餐飲王國創辦人伍沾德。年屆八十七歲高齡嘅伍沾德尋日乘坐輪椅到嶺大接受博士殊榮,伍家上下一行八人出席撐場,伍沾德心情相當興奮,仲向卓妮娓娓道出創辦美心王國嘅奮鬥史,原來當年創辦美心係因為種族歧視而起。

伍沾德憶述,五十年代初哥哥同佢都喺皇后戲院做經理,經常要帶明星去食西餐,無奈當時比較出名嘅西餐廳都係由外國人開辦,中國人去親都要坐鄰近廁所位置,受盡歧視。佢兩兄弟把心一橫,決定開設西餐廳,為華人出番啖氣。第一間美心係法國餐廳,「High-class」到要着老西打呔先至可以幫襯。

由於六十年代文華酒店及希爾頓酒店相繼開幕,美心形勢大不如前,伍沾德同哥哥於是決定將美心轉型,喺海運大廈開設第一間大眾化嘅「美心茶廳」,及後陸續開設北京樓、潮江春等中國菜館,將美心餐飲王國推至高峰。伍沾德好雀躍話,美心集團至今咁成功,完全係因為中國人肯學肯做嘅精神!

CY話樓宇政策不宜倉卒

至於另一位獲頒博士就係行政會議召集人梁振英(CY),獲頒榮譽社會科學博士,CY嘅太太及細女頌昕都有出席儀式。呢期行會興唱反調,CY當然成為被追訪對象啦,CY重申,任何行會未拍板嘅政策,行會成員都有自由表達意見。對於恢復定期賣地及復建居屋建議,CY就話制訂政策不宜太倉卒,必須經過詳細研究和廣泛討論才可決定喎!

卓妮