特首份施政報告劣評如潮，但香港金融沙皇啱啱好夠鐘「收工」，唔使再理啲煩嘢，之前佢講明話退休後會努力學Hea，畀咗成個月時間佢，唔知佢嘅學習進度如何呢？尋日中午時分，一身輕裝嘅任總，同太太翹住手行入ifc，喺佢任職多年嘅「第二頭住家」附近出現。任總話依家最忙就係要學Hea，不過仲係初學階段，笑得開懷嘅佢似乎仲未悟出Hea嘅心得。

任總身旁嘅任太笑得仲開心，一臉幸福話依家好開心，因為任總終於有時間陪佢Hea。之不過Hea呢家嘢其實係形而上學，有咩Hea得過，可能因人而異，任總用唔使做嘅心態重遊昔日工作地方，班舊戰友衝鋒陷陣，自己就他條去緬懷吓，感覺當然好唔同，都算係「大隱隱於巿」囉。講開任總，科大即將頒授工商管理學榮譽博士學位畀佢，頒授儀式於下月十三日舉行，到時大家又可以問吓佢Hea成點。

大輝25歲買千呎樓

任總夫婦恩愛行街學Hea，仲係為人民服務緊嘅立法會議員林大輝就無咁爽啦，佢朝早去廠商會開完會，就拿拿臨過ifc嘅「正斗」食番碗麵，再趕去立法會開會，夠晒充實。卓妮同佢講開依家樓價貴過97，廿五歲就置業嘅大輝話，當年佢用七十萬買咗人生第一層千呎樓，依家後生仔要靠自己買樓唔係咁易，總之此一時彼一時喇。

卓妮