上市公司太平洋興業前主席蔣麗莉（Lily）因為涉及詐騙官司，尋日到區域法院應訊，並由丈夫於積理陪同到庭，應訊完畢後，一向表現恩愛的兩口子喺法院門外不禁錫錫，而丈夫亦全程一直輕攬Lily嘅纖腰。
今年四十六歲嘅Lily被控詐騙，Lily不滿律政司將案件交區域法院審理，認為應交由有陪審團嘅法庭處理，佢先後兩次要求司法覆核律政司嘅決定，但均敗訴，但係官司纏擾一啲都冇影響佢追求家庭樂。Lily多次喺法庭出出入入，早前腹大便便嘅佢原來已經喺今年六月誕下一個囡囡，出世時五磅幾。
Lily父親係企業家蔣震，本身都育有一子六女，原來Lily都要直追爸爸，佢與丈夫原本已育有兩子一女，今次生多一個女，家庭小成員剛好湊成一對「好」字。
Lily生女後唔夠半年，已經完全修身，佢都自言：「今次呢胎修身，又確係修得快過前幾次！」散庭後，Lily同老公一齊去食飯撐枱腳。佢嘅案件將於十二月廿八日再處理。