政圈喜事一件接一件！繼保安局局長李少光升格做爺爺後，尋日民政事務局局長嘅政治助理徐英偉（Caspar）都正式同劍橋才女女友Leslie拉埋天窗，佢哋喺尖沙咀洲際酒店註冊，筵開四十圍，叫晒親朋好友、政府同僚嚟分享佢哋嘅喜悅。Caspar同Leslie係喺加拿大滙豐銀行做嘢時認識，已經拍咗拖好多年，Caspar當日為博紅顏下嫁，特登飛去英國求婚添！唔知Caspar會唔會遵照大老闆煲呔曾嘅建議，婚後生三個小Baby呢？Caspar笑笑口唔表態。
唔知係咪最近施政報告公布後鑊鑊新鮮鑊鑊甘，尋晚去飲嘅高官唔算多，就連Caspar嘅頂頭上司、民政事務局局長同副局長許曉暉都無到。有份捧場嘅包括升職無耐嘅特首辦主任譚志源、食物及衞生局副局長梁卓偉、民政事務總署署長陳甘美華同前康文署署長周達明，仲有政制及內地事務局局長林瑞麟，林D9除咗去飲喜酒，仲幫手向大家介紹對新人嘅相識經過添！