記得行會成員「金刀梁」梁智鴻講過，自己喺屋企無地位，早兩日我哋喺馬場撞到梁太陪班北美放射學會（RSNA）會員入馬場見識吓，梗係要請教吓佢御夫術啦；不過梁太一聽見就好謙咁話，自己只係跟住喺梁醫生後面，畀足面子老公。
係人都知道金刀梁公職多，依家仲做埋港大校務委員會主席，難得梁太呢位賢內助一啲都無投訴，仲好體諒咁話：「佢忙極一日都係廿四小時啫，佢好肯做嘢，每朝六點起身，做到凌晨一點返屋企；如果佢遲過一點，我先會問佢去邊！」見梁太講到眉開眼笑，我哋忍唔住問佢係咪好滿意呢個老公，梁太即刻有啲唔好意思咁話︰「我係好欣賞勤力嘅人！」
其實本身係放射科醫生嘅梁太都好本事，佢係RSNA香港唯一嘅成員，仲係香港放射科醫學院創會會長，培養醫生做放射專科醫生，所以都好忙碌，不過兩公婆雖然見面少，但話題就源源不絕。梁太仲醒咗一個夫妻相處之道畀大家，就係唔好為難個老公︰「我哋結咗婚卅二年，從來唔會慶祝，佢咁忙，要佢記住特別日子會好辛苦，唔好令佢尷尬啦！」