變相摑咗煲呔曾一巴

年半前購入中區豪宅「堅麗閣」自住嘅張建東話，當時呎價都係一萬元鬆啲，但依家豪宅炒到七萬元一呎，確實貴到離晒譜，仲講笑話：「我梗係買唔起啦，買一百呎就買得起！」他認為，雖然並非所有樓宇都做到咁高價錢，但單一天價會令人有錯覺樓市好好環境，一窩蜂入市高追，形成樓市泡沫。張建東嘅講法，變相摑咗煲呔曾一巴！

我哋尋日巧遇四叔與「股壇教父」李業廣去中環國金二期國金軒食晏，問四叔點睇豪宅樓價屢創新高，好多中產及專業人士都話買唔到樓，四叔就話，佢會視豪宅為「珠寶或無價寶」，事關買一層就少一層，有錢就梗係想歎世界啦，啲錢放喺度做乜啫！四叔話，不可以七萬元呎價作為準則，現時兩至三萬元一呎都可以買到豪宅。

與九七相比唔算好貴

四叔坦言，香港取消遺產稅，又歡迎內地人來港投資，內地人力量好大，貴一貴都買來投資，正因為豪宅搶貴咗上嚟，令人心理上覺得整體樓價貴咗。至於豪宅呎價係咪見頂？四叔不假思索話：「係咁上下，啱㗎喇！」言下之意似乎話差不多見頂喇。四叔仲指出，其實豪宅只係佔整個市場百分之一至二，其餘大部分都以中價樓為主，與九七年樓市高峰期比較，目前中價樓呎價都唔算好貴啫！

對於煲呔曾叫人買偏遠嘅新界樓，四叔稱：「新界地、新界樓最多係我哋！」有無呎價低過四千元呢？佢話：「二千元一呎都有，去天水圍買囉，有平有貴任你揀！」有議員建議恢復定期賣地，四叔早前都話贊成定期賣地，但他指現時豪宅用地所剩無幾，中價樓用地則可有可無，有無佢都覺得無乜所謂喎。

創出天價嘅港島半山干德道「天匯」，為恒基旗下焦點豪宅樓盤，四叔「賣花讚花香」話，一兩層特色戶有豪華裝修，有水晶，有雲石，仲有完善配套，包括獨立花園、游泳池、平台等，買一伙幾乎有兩伙咁多地方用。據聞四叔愛兒李家誠有意買番個「天匯」單位，四叔就澄清：「佢（家誠）嗰個單位仲靚，咁貴佢唔捨得買！」會否打個折頭畀家誠？「我都唔知佢想點，都係唔捨得買㗎喇！」