呢嗱，就咁，你可以去房屋署轄下街市租兩個相連檔位，檔口擺少少雜物掩飾，裏面咯喎，就安放傢俬床鋪，搵個煮食爐開埋火爨都仲得。如果你貴為人父人母，當然要湊仔湊女啦，街市兩個相連檔口其實係有足夠空間畀你放滿嬰兒用品㗎，連ＢＢ車都放得落。於是乎，神奇地，你就有一個民宿安樂窩嘞。

咦，咪住先，街市可以住人過夜大覺瞓嘅咩？理論上梗係唔得啦，莫講話街市唔係民宿，即使係工廠大廈，住人都係犯法嘅。之不過咁，呢條絕世好橋最美妙嘅關鍵就係，事實上係冇人理你㗎，房署職員又懶理，管理公司又不管。就算有保安員巡視，親眼見到前舖後居煮飯仔嘅奇景，佢哋都會自動瞌埋雙眼扮盲俠。

大家可能會半信半疑咁問，有冇咁筍咁過癮？有冇老點搵人笨？功夫茶信譽保證，絕對過癮，絕無搵笨。記者直踩現場直擊報道，前舖後居嘅民宿位於石硤尾白田街市，檔口裏面基本設施一應俱全，有電飯煲啦，有洗衣機啦，有熱水壺啦，床鋪更加唔少得，根本同一般住宅套房冇分別。吖，功夫茶講漏咗一樣，街市民宿唔止夠地方擺ＢＢ車，連童裝單車都放得落，簡直有得住又有得玩！

講到呢度，大家係咪心郁郁呢？係咪想租番兩個街市檔口改建成歡樂天地呢？嗱嗱嗱，唔係話唔得，不過記住唔好再去石硤尾白田街市喇，因為嗰度已經揚咗，房署接到投訴之後，已經要求租戶糾正，否則終止租約。如果真係想搵番個風涼水冷嘅前舖後居，去其他街市比較安全。你知啦，港產官僚出晒名踢一踢，郁一郁，你唔踢，佢唔郁，其他街市未有人投訴之前，房署應該係會照例長期玩龜縮，與世無爭乜都唔理嗰隻。

話時話，香港人真係好識得靈活變通，一家大細瞓街市咁絕嘅計仔都諗得出。不如咁嘞，計功夫茶話齋，反正港產官僚懶得監管，全港街市空置率又咁高，索性一家便宜兩家着，瞓街市合法化囉。

街市空置率有幾高？犀利咯，食環署轄下一萬四千九百零九個街市攤檔，空置率超過兩成，即係三千幾個檔位冇人吼，最啱廢物利用變民宿。咦咦咦，曾蔭權話要幫中環街市搞活化喎，正呀！瞓街市的同胞們，上呀！有人住等同活化，掂呀！