港大研究發現肉類含抗藥性大腸桿菌，進食感染後可引發難以根治嘅尿道炎，家陣人人自危，擔心隨時中招。向來無肉不歡嘅立法會議員「象哥」黃定光危機較大，事關佢自封「肉皇大帝」，除咗人肉之外，乜嘢肉類都食過，但最近都減少食肉，原因並非驚感染抗藥性大腸桿菌後無藥醫，而係怕食得肉多會加快衰老。
象哥曾經看過一些營養雜誌，提到肉類可以促進新陳代謝，年輕力壯嘅人食咗會強壯啲，但年紀大食得肉多就加快衰老，好似佢年紀有番咁上下，飲食好應該節制吓，盡量少肉多菜，由以前八成肉和兩成菜嘅比例，改為菜和肉各佔一半，無奈工作應酬太多，一年無幾多日在家食飯，少不免又要食肉，惟有食到一半就鬆人。
雖然象哥飲食少肉多菜，但秋風起又令佢想起膽固醇勁高嘅大閘蟹。做出入口生意嘅象哥每年呢個時候，都會預留幾籮又靚又多膏嘅大閘蟹招待傳媒朋友，自己例牌食埋一份。不過，大家毋須為象哥健康擔心，因為佢之前講過唔怕心臟病，只係最怕荷包「乾（肝）硬化」。