其實棠哥早前出席一個深港教育合作研討會時，講開自己曾建議政府喺深圳開辦學校畀港人子女就讀，不過時任教統局常任秘書長以一句「福利不可攜」拒絕，但呢個前常秘依家做咗港區人大之後就成日講，點樣喺深圳起學校，教育下一代。棠哥咁講，大家即時聯想起嗰個就係教統局前常秘羅范椒芬，事件仲有餘波添。

羅太事後同我哋鄭重澄清，「福利不可攜」係政府政策，唔係佢一人可以話變就變，而且佢亦唔係棠哥所講咁一口拒絕，而係有將建議攞去同政務司司長反映，事關福利問題牽連甚廣，除咗教育福利，仲有醫療福利、社會保障福利等，的確需要政府一籃子去傾，唔係一個常秘話得事。羅太又再三聲明，並唔係佢自己喺深圳起學校，而係透過家族基金喺寧波建校。羅太仲話，報道出街後，棠哥已拿拿臨致電向佢道歉補飛，不過羅太就叫佢自己向傳媒解釋，難怪棠哥尋日一見到我哋就閃人啦！