前財政司司長梁錦松離開政府之後未停過，依家係美國百仕通集團高級董事總經理，又係中國藍星副董事長，仲搞咗個國際小母牛香港分會；最近阿松又有新動向，就係喺大學執教鞭。早前天津南開大學請咗阿松做客座教授，前日阿松仲親自北上，一來為南開嘅師生主持《金融海嘯一周年反思》講座，二來為正式接受南開大學嘅聘書。
阿松話自己咁耐以嚟大大話話經歷過九次金融危機，佢總結出三個金融海嘯嘅成因，包括「金融產品複雜」、「借債過多」以及「投資人、交易員經驗不足」。佢又睇好國家經濟發展，話只要唔打仗，未來二、三十年要保持咁高嘅增長速度唔係難事。
雖然阿松有豐富嘅財金經驗，不過嚟捧場嘅師生似乎唔只淨係睇中佢嘅履歷，仲好想見吓佢另一半，就係退役後嫁咗畀佢嘅中國跳水王后伏明霞。講座嘅另一個主持就同阿松講，叫佢下次有機會帶埋太太出嚟同大家見面，引起全場拍掌支持。不過阿松就笑笑口唔答，睇嚟南開嘅學生想見松太一面都唔係咁易。